O pavillón de Monte dos Postes abrirá a vindeira semana

O Concello lamenta a demora nas obras e agarda que as e os usuarios poidan utilizar as instalacións a comezos de marzo

O estudantado do CEIP Monte dos Postes non pode utilizar o seu pavillón dende o pasado mes de novembro, por mor das obras de reparación da cuberta que, malia a estimación inicial de dous meses de duración, aínda non remataron. Esta demora nos prazos previstos causou certa indignación entre o profesorado e a ANPA do colexio, que manifestou o seu malestar nas últimas datas. Noa Morales, concelleira de Deporte, asegura que a obra está xa rematada e só falta “tramitar” a súa “recepción final”.

- Publicidade -

Unha reforma “moi necesaria”

A demora nesta obra, segundo indican dende Raxoi, debeuse a problemas de subministro de material. O concelleiro responsable da área de Obras, Rafa Peña, desculpouse pola tardanza e garantiu que todo este proceso compensarase “con creces” unha vez sexan estreadas as novas instalacións, xa que a reforma da cuberta era “moi necesaria”.

Con todo, o Goberno local coida que o pavillón poida abrir as súas portas ao longo da vindeira semana. Asemade, Peña lembrou que este arranxo chega “seis anos tarde” e que a corporación municipal debera ter actuado “moito antes”.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego