“A outra fin da terra. Ao final do camiño, a alegría e a calor dos celtas do sur”, con este lema, Galicia é a protagonista desta 49ª edición do Festival Intercéltico de Lorient polo que pasarán, ata o 11 de agosto, artistas como Milladoiro, Xosé Lois Romero & Aliboria, Abraham Cupeiro, Tiruleque, Carlos Núñez, Mercedes Peón, a Banda de Música de Forcarei ou o Grupo de Música e Baile Tradicional Xacarandaina.

A delegación galega do Festival Intercéltico de Lorient, integrada por máis de 300 artistas, participou durante este domingo no Gran Desfile das Nacións Celtas, un encontro cultural que nesta edición dedicou a súa anual homenaxe á Comunidade, ao conmemorar o Ano de Galicia.

O desfile tivo lugar polas rúas da cidade francesa de Lorient e contou coa participación de máis de 3.500 músicos, cantantes, bailaríns, artistas visuais e académicos cineastas procedentes das rexións celtas (Asturias, Bretaña, Cornualles, Escocia, Illa de Man, Irlanda, Gales e Galicia). O evento foi seguido en directo por máis de 70.000 persoas, segundo sinalou a Xunta nun comunicado de prensa.