A Asociación de Pacientes e Usuarios do CHUS denuncia que os medios de prevención contra a pandemi do COVID-19 para pacientes e persoal sanitario son “claramente insuficientes”. “O confinamento por sí só non vai conter a pandemia. Sen actuar sobre as persoas de risco, estaremos sempre indo a remolque dos acontecementos e chegaremos a unha situación onde o grupo vulnerable máis importante, o persoal sanitario, acabe sendo o máis afectado, co consecuente colapso do sistema público de saúde”, denuncia o colectivo. A asociación pide realizar de forma ordenada os test de contaxio a toda a poboación de maior risco. Con isto, nunha nota de prensa, adxuntan unha testemuña que se corresponde cunha familiar dunha paciente de 72 anos ingresada na planta de pneumoloxía.

- Publicidade -

“Miña nai, de 72 anos (paciente de risco con diversas patoloxías, entre as que están unha grave enfermidade pulmonar en estado avanzado, insuficiencia renal, diabetes tipo 1 etc.) presentou febre alta (39 graos) a noite do domingo. Pola mañá e por recomendación do hospital de día, da que é paciente, levámola por urxencias, onde estaría unha doutora esperando por ela. Foi acompañada de miña irmá, á cal mandaron marchar (cousa que nos deu moita pena, xa que miña nai é xorda dun oído e está en tratamento psiquiátrico por unha forte depresión), pero que entendemos perfectamente dada a situación. Dixéronnos que nos chamarían para informarnos do que fose.

Chamáronnos sobre as doce da noite para dicirnos que estaba ingresada na planta de pneumoloxía e que podía estar acompañada por unha persoa. Isto xa nos pareceu unha medida moi irresponsable. Non nos malinterpretedes: como é lóxico, con todas as patoloxías que presenta miña nai, está hospitalizada mes sí mes non e estamos máis que acostumados a facer vida no hospital, pero cremos que nun estado de alarma onde todo o país está confinado nas súas casas para evitar os contaxios e a saturación nos hospitais, este non é un procedemento moi ortodoxo, sobre todo no que respecta a enfermos con patoloxías pulmonares graves. Por suposto, nós que somos cinco irmáns (catro dos cales levamos varios días sen visitar a nosa nai para evitar posibles contaxios, xa que vive nunha aldea con miña irmá maior, está coidada por ela e temos traballos con moito risco de contaxio), decidimos, por seguridade, que nosa nai estivese coidada polo persoal sanitario e non expoñela. Pero isto tampouco é a razón da queixa.

A NEGLIXENCIA con maiúsculas é o escenario que atopou miña irmá esta mañá cando lle foi levar uns artigos de aseo e é o que nos trae aquí:  Entrou no hospital sen ningún tipo de control. Tanto na entrada como no ascensor para acceder á planta, atopou persoas protexidas con mascarilla e guantes, si, pero moitas outras NON. Chegou á planta de pneumoloxía e, unha vez máis, accedeu coma se estivésemos nun mes de marzo normal, xente indo e vindo, moitos deles sen NINGÚN TIPO DE PROTECCIÓN. Chegou ao cuarto onde estaba miña nai. O acompañante da paciente do lado SEN PROTECCIÓN e recibindo visitas. A conversa co persoal médico, tampouco foi moi alentadora: Non se lle fixo a proba do coronavirus, incluso despois de recalcarlle que convive cun neto que viaxou a Oporto estes días. Non nos deron explicacións convincentes sobre este motivo… pretextos e dúbidas. E cando miña irmá lles recriminou as auxiliares (sempre desde a amabilidade) que non entendía porque había persoas pululando por toda a planta de pneumoloxía dun hospital sen ningún tipo de protección, (as enfermeiras si que van protexidas) cando o resto do país está sometido (e con razón) a medidas estritas de seguridade e hixiene para protexer sobre todo os máis vulnerables e frear esta pandemia. A contestación foi:  ISO VAI NO CRITERIO DE CADA UN. AÍ HAI GUANTES E LÍQUIDO DESINFECTANTE. O QUE QUEIRA LAVAR AS MANS, QUE O FAGA E O QUE NON, NON. Se este proceder no que están poñendo en perigo A VIDA de miña nai e o resto de pacientes desa planta non é denunciable, que baixe Deus e o vexa.”

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego