O vindeiro 2 de xullo entrará en vigor a Lei de Espectáculos de Galicia, aprobada en solitario polo PP, que prohibe as actuacións ao vivo en discotecas, karaokes e calquera outro local de ocio. Esta medida conta cunha forte oposición do sector hostaleiro e o apoio da asociación empresarial Compostela Monumental, que denuncia unha “campaña orquestrada” por entidades coma Hostelería Compostela para, presuntamente, defender a mensaxe do Goberno local.
Pola súa banda, o alcalde de Santiago, Martiño Noriega, lamenta unhas acusacións que considera infundadas. “Quen acusa a estes colectivos está lonxe da realidade”, apuntou o rexedor, en referencia ás críticas de Compostela Monumental. Asemade, lembrou que a devandita entidade ten “as contas sen regularizar” e unha “dubidosa representatividade”.
Compostela Monumental ten as contas sen regularizar e unha dubidosa representatividade
A defensa desta lei por parte de Compostela Monumental baséase na premisa de que a veciñanza do casco histórico só quere “exercer o seu dereito a poder durmir”, fronte ao “xogo sucio” de “personaxes” que, coas súas actuacións, “poñen en perigo a convivencia e seguridade da zona”. Noriega, en cambio, mantén que a música ao vivo é un “sinal de identidade” da cidade e considera que Compostela é xa unha cidade segura.
Dende o pasado mes de abril, varios locais do municipio optaron por prescindir das actuacións en directo por medo a posíbeis sancións, xa que a novidosa normativa segue adiante e, malia as numerosas voces críticas, semella que nada poderá detela.
