Pontevedra acollerá mañá, 29 de xullo, a apertura do ciclo ‘Con voz de muller’, a iniciativa cultural que asentará na Praza da Ferraría ata o 2 de agosto. Esta iniciativa cultural, creada co obxectivo de combater a fenda de xénero no ámbito artístico, ofrecerá un total de dez espectáculos protagonizados integramente por mulleres, repartidos entre concertos na Praza da Ferrería ás 22.30 horas xunto aos pasarrúas ás 20.30 horas.
Gala i Ovidio, a grande apertura do ciclo
O ciclo abrirase o día 29 co pasarrúas de Troula e Psychodelia para logo dar paso ao concerto con “Gala i Ovidio”, o proxecto de Raül Refree e Aida Tarrío, integrante de Tanxugueiras, que combina cantos tradicionais con electrónica.
O día 30 será a quenda de “Meigas”, o espectáculo das humoristas Sobria e Serena, formado por Arancha, Areus e Jazmín Abuín, que ofrecerán unha sucesión de monólogos con perspectiva de xénero. O pasarrúas das 20.30 horas será a cargo de Cafuné.
A programación continuará o día 31 co pasarrúas das Pandereteiras de Ronsel e a actuación da cantante Queralt Lahoz, á que Gómez definiu como “unha das sensacións musicais máis emocionantes que podía haber hoxe en día”, grazas á súa mestura de sons latinos, folclore e música urbana.
O sábado 1 de agosto poderase gozar do pasarrúas do coro Happy Singers para logo subir escenario Tres Pesos, grupo liderado por Felisa Segade e centrado na música tradicional galega. O ciclo fecharase o domingo 2 co pasarrúas de Áureas, Gala i Ovidio xunto a Sobria e Serena que culminará coa gala circense “As Cirqueiras”, un espectáculo con elenco integramente feminino que combinará números aéreos, danza, música e humor cunha mensaxe de empoderamento e sororidade.
Un verán de festas en Pontevedra
A programación das festas de verán en Pontevedra inclúe máis de 300 actividades que se están a estender durante os meses de xullo, agosto e setembro. As festas, que xa arrincaron con eventos como o Surfing de Lérez, Sete Falares ou Bdragráfica, incorporan propostas en Xeve, Monte Porreiro, a Eiriña, San Roque, o Burgo, Lérez e o centro da cidade.
A programación destaca por incorporar espectáculos de deseño propio para Pontevedra coma o certame de maxia Pontemaxia ou a colaboración da Banda de Música de Salcedo coa compañía de circo Pistacatro.
A novidade do programa deste ano é a inclusión dunhas lentes homologadas de agasallo para observar de xeito seguro a eclipse solar que coincidirá coas festas da Peregrina e tamén unhas recomendacións específicas de como ver este fenómeno con garantías, da man da Asociación astronómica Sirio.
