Xemelgas e xéminis, case poderiamos dicir que valen por catro, pero foi en formato trío como revolucionaron a escena musical galega, con esa mestura entre o tradi máis punki e os ritmos urbanos. Vencedoras morais do Benidorm Fest, triunfaron en Riazor, pero tamén en Balaídos. Durante moito tempo puido costar distinguilas, pero elas tiveron claro que eran opostas case dende o mesmo nacemento, o ying e o yang, o branco e o negro. Neste capítulo 4 do videopodcast producido e realizado por Nós Televisión, que presenta Luís Pardo, suben a O VAGÓN, dous terzos de Tanxugueiras, Olaia e Sabela Maneiro.
As irmás Maneiro fan un repaso aos seus inicios no mundo dos escenarios, contan como coñeceron a Aida Tarrío, valoran a situación da industria musical galega, falan sobre o cambio de representantes que acaban de levar a cabo, sobre os ataques que teñen sufrido en redes, sobre a participación de Israel en Eurovisión, sobre por que cantan en galego, sobre como levaron e levan a fama, e ata xogan e cantan neste videopodcast dentro do tren.
O programa #OVagón recibiu o Premio no I Certame ‘Fondo de Apoio a Proxectos Culturais Singulares para a Mellora Social 2025’ da Deputación da Coruña e está patrocinado por Deleite e Daveiga, ademais de contar co apoio de Gadis e A Estación do Concello de Vedra, onde foi gravado. Conta en todos os capítulos cunha sección especial en colaboración con Aquí tamén se fala e unha sección de Xogo ideada pola xornalista Xiana Arias e presentada, neste capítulo, por ela mesma.
