O filme documental ‘Saber Galiza. O Seminario de Estudos Galegos’ dirixido por Cristina de la Torre e producido por Nós Televisión chega este xoves a Arteixo grazas ao ciclo ‘Outono das Artes‘ da Deputación da Coruña. A proxección será ás oito da noite na Capela do Balneario.
A proxección, que é de balde e aberta ao público, contará coa presentación e coloquio coa directora do filme.
Xira do filme dentro do Outono das Artes
A xira xa arrancou o 27 de setembro en Melide e, ademais de hoxe en Arteixo, o filme estará ao longo do trimeste nos concellos de Val do Dubra, Pontedeume, Betanzos, Frades, Corcubión, Brión, Mazaricos e Rianxo.
A revolución da cultura e ciencia galegas
‘Saber Galiza. O Seminario de Estudos Galegos‘ é un documental que recupera a historia e o legado dunha das institucións fundamentais da cultura galega do século XX. A través de testemuños de especialistas, documentación histórica e a participación de estudantado da Universidade de Santiago de Compostela, o filme percorre a traxectoria do Seminario de Estudos Galegos, pioneiro na investigación científica e humanística sobre Galicia. Unha proposta divulgativa que invita a redescubrir unha experiencia colectiva decisiva para comprender a historia, a lingua e a identidade do país.
