O documental Rapa chega este venres aos cinemas galegos

Baixo a dirección do vigués Alejandro Enríquez, o documental ‘Rapa’ chegará aos cinemas galegos este venres. Esta película retrata a tradición da Rapa das Bestas de Sabucedo e ofrece un relato sensible sobre a loita dunha comunidade por manter vivo o seu vínculo ancestral coa terra e os cabalos salvaxes.

O filme está protagonizado polos veciños e veciñas da aldea de Sabucedo, que preserva ese vínculo ancestral e íntimo cos cabalos salvaxes. O cabalo galego de monte está a desaparecer, só unhas poucas bestas resisten acosadas polos cuatreiros, os lobos… e agora tamén polos parques eólicos.

Os conflitos dos cabalos son os conflitos da comunidade pero case non quedan veciños para defender o territorio. Unha vez ao ano a aldea celebra a “Rapa das Bestas” e 15.000 persoas acoden a presenciar o atávico, os veciños cortando as crinas dos cabalos nun enfrontamento corpo a corpo. Pero todos marchan e ninguén ve a realidade detrás da Rapa: cada ano hai menos bestas no monte e –coma nun espello– menos xente na aldea.

Estrea nos cinemas

Con motivo da estrea do documental RAPA, o seu director Alejandro Enríquez estará este xoves nos Cantones Cines da Coruña para presentar o filme e manter un coloquio posterior co público asistente. O photocall será ás 19.45 horas e a proxección, ás 20.15 horas.

A estrea de ‘Rapa’ nos cinemas, que terá lugar o 22 de marzo, contará cunha xira especial en salas de varias localidades galegas, que promete ser unha experiencia cinematográfica que vai máis aló dun simple testemuño visual da tradición galega.

FERROL

Fecha: 22 de marzo

Hora: 17:30h

Lugar: Duplex Cinema
Coa presenza do director

CEE

Fecha: 22 de marzo

Hora: 20:00h

Lugar: Cines Xunqueira

A ESTRADA

Fecha: 23 de marzo

Hora: 11:00h

Lugar: Minicines Central

SANTIAGO

Fechas:

23 de marzo, 21:20h

25 de marzo, 21:35h

Lugar: Numax

VIGO

Fecha: 24 de marzo

Hora: 19:30h

Lugar: Cines Tamberlick

O equipo de Rapa

Alejandro Enríquez cofundou a produtora Mondotropo, onde comezou como montador e dende 2010 asumiu os roles de CEO e produtor executivo. Mondotropo especialízase na produción publicitaria, aínda que nos últimos anos abriu unha nova liña de produción para desenvolver proxectos propios.

Rapa‘ é unha produción de Rapa A Película AIE. Conta coa subvención de Agadic – Xunta de Galicia. Co apoio da Deputación de A Coruña, TVG, Turismo de Galicia e Crea SGR. Baños Films distribuirá o filme nos cinemas do territorio español. As vendas internacionais corren a cargo de Feel Sales.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego