Co gallo do décimo aniversario, Nós Televisión lanza unha campaña de agasallos culturais para todas as persoas subscritas a este medio de comunicación. Os obsequios, que comunicaremos ao longo do 2023, incentivarán o consumo de cultura galega e en galego. Por iso, entre os agasallos difundidos para este mes de xaneiro atopamos:
Concerto Luar na Lubre
O primeiro concerto deste 2023 de Luar na Lubre será en Ourense, o 13 de xaneiro. A banda máis representativa do folk galego, que tocará ás 21 horas no Teatro Principal ourensán, conta xa con máis de tres décadas de carreira, dezanove discos publicos e máis de 1.500 concertos ofrecidos en máis de trinta países. Para entrar no sorteo de dúas entradas debes estar subscrita a Nós Televisión.
Concerto da xira de Sés
‘Diante un Eco’ é o oitavo disco de Sés nos seus once anos de carreira. Este novo traballo presentarase en seis concertos xa confirmados en Galicia sendo un deles o que terá lugar o vindeiro sábado 28 de xaneiro ás 20.30 horas no Teatro Afundación de Vigo. Se estás subscrita a Nós Televisión, podes entrar no sorteo de dúas entradas para este concerto.
Actuación Chévere: N.E.V.E.R.M.O.R.E. (versión adaptada)
A Casa de Cultura de Bertamiráns ás 20.30 horas do 20 de xaneiro acollerá a estrea galega da versión adaptada da obra N.E.V.E.R.M.O.R.E da compañía Chévere. N.E.V.E.R.M.O.R.E. é a resposta indescifrable que o corvo do poema de Poe dá unha e outra vez ás preguntas dun home que perdeu o que máis quería. Para entrar no sorteo de dúas entradas debes estar subscrita a Nós Televisión.
