Os Premios Bacelos de Prata, convocados pola Asociación Álvaro das Casas para galardoar ás empresas que apostan polo galego no sector agroalimentario, distinguiu na súa XV edición á Adega Tapias Mariñán e a Leite Noso Sociedade de Gandeiros Galegos.
O xurado valorou a aposta pola lingua galega de ambas entidades destacando tamén o seu uso nas etiquetaxes. Este é o caso tanto de Adegas Tapias Mariñán, da Denominación de Orixe Monterrei, situada na localidade de Pazos (Verín), con actividade desde o ano 2007 como a empresa Leite Noso Sociedade de Gandeiros Galegos constituída no 2016, en Santiago de Compostela, coa vontade de garantir unha produción de leite de calidade e a súa comercialización a través de dúas marcas, Deleite e Muuu.
