A sétima edición do Enreguéifate bate a marca de participación coa presentación de máis de medio cento de vídeos

O certame Enreguéifate, que este ano chega á sétima edición co lema ‘Temos madeira regueifeira!0, pecha as inscricións cun total de 56 vídeos recibidos, 47 deles na categoría escolar e 9 na xeral, batendo todas as marcas de participación. As regueifas chegan desde todos os recunchos das catro provincias galegas (Ames, Carballo, Pontevedra, Santiago de Compostela, Teo, Vigo, Vilalba, A Coruña, Viana do Bolo, Melide, Vila de Cruces ou Dodro, entre outros municipios) e xa poden verse tanto na canle de Youtube coma na web do certame.

Deste xeito, comeza a fase de votación do xurado, que nesta ocasión está composto por Carme Pereiro, normalizadora lingüística do Concello de Carballo; Fátima Souto, do Servizo de Normalización Lingüística do Concello de Ames; Manolo Maseda, mestre, músico e regueifeiro; e Séchu Sende, mestre, escritor e regueifeiro.

Como en anteriores edicións, hai seis regueipremios para cada unha das dúas categorías (xeral e escolar): regueifa máis brava, máis aguda, máis diversa, máis reivindicativa, mellor cantada e mellor falada. Os vídeos galardoados comunicaranse ás persoas gañadoras e anunciaranse a partir do 11 de marzo a través das redes sociais do Enreguéifate. O mércores, 3 de abril, terá lugar a gala de entrega de premios no Teatro Principal de Santiago de Compostela.

Enreguéifate!

Enreguéifate é un proxecto impulsado polos Servizos e Departamentos de Normalización Lingüística dos concellos de Ames, Carballo, Pontevedra, Santiago de Compostela e Teo que apoia a difusión da improvisación oral en verso (regueifa) para contribuír, por medio dela, á promoción do uso da lingua galega.

Con esa finalidade, en paralelo ao certame de regueifas en vídeo, dende o mes de outubro de 2023 e ata o pasado mes de febreiro, desenvolvéronse un cento de obradoiros de improvisación oral destinados ao alumnado de 5º e 6º de Educación Primaria e da ESO de preto de corenta centros educativos dos concellos impulsores.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego