Valentín G. Formoso: “A cidadanía sempre nos ensina a nós e nós nunca á cidadanía. É así de triste”

O Presidente da Deputación da Coruña é crítico coa falta de visión da Xunta no fomento do emprendemento e na falta de respostas para o rural galego

Estivemos co presidente da Deputación da Coruña, Valentín González Formoso, falando do Plan de Emprego Local do ente provincial, de emprendemento e da situación do rural galego.

- Publicidade -

Sobre o plan que está a desenvolver, recorda que o que fai a Deputación “é un gran de area”, xa que quen ten as competencias e os fondos son as consellerías da administración autonómica. Critica tamén que na Xunta se vaia sempre “a remolque das iniciativas europeas”.

Para cambiar iso, Formoso explica que dentro do Plan de Emprego Local tamén se creou a Rede provincial de Espazos de Traballo. Salienta que é unha iniciativa innovadora e que non hai moitas no estado, xa que “non é só unha incubadora”, ao ser tamén centros sectoriais para perfís diversos, coma os proxectos do centro de Boiro coa industria do mar ou Ames no audiovisual.

Tamén quixo pór en valor a vida no campo, onde di que é posible ter unha maior calidade de vida: “Aínda escoitamos esas frases ‘desertores do arado’, ‘pequeniño, escapa do campo’”. Cre ademais, que ata o de agora, e malia as potencialidades do país, a administración non presentou alternativas: “É unha pena. Galicia adolece dunha ordenación territorial e forestal.”

Citando o caso dun mozo sociólogo que estivo a piques de emigrar, Formoso lembra que hoxe hai persoas mellor formadas que nunca nas nosas universidades que rematan migrando pola falta de oportunidades: “A cidadanía pide dinamismo e pide decisión. A inacción das administracións fomenta a migración.” Nesa liña, subliña que “as administracións son moi conservadoras”: “A cidadanía sempre nos ensina a nós, e nós nunca á cidadanía.”

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego