Para combater as violencias machistas é precisa unha arma fundamental: a educación. Hai que cambiar os esquemas tradicionais sobre o comportamento de homes e mulleres dende o ámbito educativo. Con esta idea convocou a USC un acto de denuncia contra as violencias machistas no que se premiou a catro estudantes da Universidade polos seus lemas en defensa da igualdade.
Con este acto péchase unha intensa semana de eventos públicos contra as violencias machistas na edición máis exitosa da campaña ‘En negro contra as violencias’.A concelleira de Igualdade, Marta Lois, e a Secretaria Xeral de Igualdade da Xunta de Galicia, Susana López Abella, fixeron un chamamento á concienciación social e incidiron na necesidade de combater actitudes machistas dende a mocidade.
Máis galardóns
Na cerimonia entregáronse tamén os galardóns dos Premios á Introdución da Perspectiva de Xénero. Na modalidade de docencia as gañadoras foron Carmen Franco e Carol Gillanders, mentres que en investigación o premio foi para Guadalupe Jiménez.
