O movemento en Defensa do Tren A Coruña e As Mariñas manifestábase en decembro en Ferrol pedindo un medio de transporte “moderno e eficiente” na comarca de Ferrolterra e As Mariñas. Desde a plataforma critican a falta de vontade política: “Desmantelan o tren e logo din que non se usa, o cal non é máis que unha gran mentira para seguir co desmantelamento”.

- Publicidade -

Nos concellos polos que pasa a liña Ferrol-A Coruña viven 482.000 persoas, case unha quinta parte do país, “persoas que poderían viaxar comodamente no tren se estivera en condicións: con máis servizos, mellores horarios, tempos e cadencias“, explica nun díptico a Plataforma.

Lembran tamén que a liña actual é “aproveitable” e que o investimento necesario para poñer en marcha un servicio digno non sería “tan desorbitado”, máis aínda se se compara co investimento no AVE. Ademais, lanzan unha pregunta: “Galicia é o único país costeiro do estado español que non ten tren de cercanías. Euskadi, Cantabria e Asturias téñeno. Por que?

Un exemplo: ir da Coruña a Ferrol en tren supón 1 hora e 14 minutos na viaxe máis rápida, con frecuencias pésimas (por exemplo, non hai ningún tren entre as 9:00 e as 13:30). Practicamente o tempo de viaxe é o mesmo tempo que A Coruña-Vigo, pero con frecuencias moito peores. Ademais, a liña ten retrasos e cortes de servizo moi habituais, como conta unha usuaria neste blogue.

Tamén resulta preocupante a situación a nivel demográfico, xa que vilas como Pontedeume ou Miño carecen de calquera transporte público cunha mínima eficiencia: o traxecto Pontedeume-Coruña é de 51 minutos, cando en coche se tarda xusto a metade (26′). O bus, en mans privadas, conta incluso con peores frecuencias que o tren. Cómpre destacar que unha gran parte das persoas destas vilas traballan en Ferrol ou Coruña, polo que se ven obrigadas a se desprazar en vehículo privado, co conseguinte custo económico, temporal e medioambiental.

Mobilizacións e unidade dos concellos

Manifestación de novembro en Pontedeume. Imaxe: Plataforma en Defensa do Tren A Coruña e As Mariñas

En novembro, alcaldes e concelleiros dos diferentes municipios participaban nunha manifestación en Pontedeume pedindo un “ferrocarril público e social; ecolóxico, eficiente e sostible”. Na viaxe reivindicativa e manifestación do pasado día 14 en Ferrol tamén participou o Movemento Galego Polo Clima.

Ademais, a principios de decembro, o concello da Coruña facía visible a súa “aposta polo impulso dun servizo de cercanías”, en verbas do concelleiro de Mobilidade Juan Villoslada. A Marea Atlántica, que participou na mobilización do día 14, incide en que só con 200.000 se podería reducir en 15 minutos a viaxe, en referencia ao bypass de Betanzos-Infesta.

Mentres, a Xunta e goberno do estado seguen a voltas coa data da chegada do AVE. As últimas novidades sobre o cercanías, recollidas no Plan Director del Corredor Atlántico de febreiro, fala de melloras na liña -sen concretar- a partir de 2023. Por outra banda, a Xunta tiña anunciado en 2009 a creación dun “ente ferroviario galego” para transferir as competencias necesarias para articular os cercanías. Malia que foi lembrado numerosas veces durante estes anos pola oposición no Parlamento, nada aconteceu.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego