A Praza de Abastos de Santiago amosou este xoves unha imaxe pouco habitual, ficando practicamente deserta. Apenas houbo actividade e tránsito de persoas debido a que a meirande parte das traballadoras dos diferentes postos e comercios decidiron secundar a folga feminista.

Porén, arredor dunha vintena de traballadoras da Praza acudiron ao seu posto de traballo porque aseguran que precisaban os cartos e que, no caso de facer folga, poderían perder aos seus clientes. De calquera xeito, isto non impediu que todas elas respaldasen as reivindicacións do movemento feminista e convidasen ás mulleres máis novas a participar nas concentracións para “loitar pola igualdade” entre homes e mulleres.