As e os amantes da cervexa teñen unha cita ineludíbel esta fin de semana na capital galega. O parque de Belvís converterase no escenario da segunda Feira da Cervexa Artesá Compos Beer Fest, un evento que se celebrará entre o 15 e o 17 de xuño e porá en valor o procedemento tradicional de elaboración da cervexa.
Aquí non haberá sitio para a cervexa industrial, mais si que haberá a disposición das e dos asistentes diferentes food-trucks que incluirán comida vegana e sen glute. Asemade, as crianzas poderán gozar dun espazo de lecer con xogos tradicionais, contacontos e obradoiros.
Outras actividades
O Compos Beer Fest estará acompañado por unha ampla oferta musical da que participarán artistas como Blue Monk, Breaking Bones, La Sincereza ou DJ Fishman. A organización artella tamén a preparación dunhas “Olimpiadas Cervexeiras” e un curso de elaboración de cervexa artesá.
