O mundo rural, o medio ambiente e as nosas tradicións conforman a quinta edición da MUSA, Muiñada, Magosto e Samaín, organizada pola Asociación A Rapa das Bestas e a Asociación de Veciños/as de Sabucedo. Este evento, creado en 2015 e consolidado no calendario de festas de outono da provincia, celebrarase este sábado, 2 de novembro, cunha ducia de actividades que se prolongarán durante 15 horas ininterrompidas.
A veciñanza confía en volver encher a aldea da man de actividades como o roteiro de Sabucedo, os obradoiros vespertinos e a escura procesión da Santa Compaña ata o cruceiro. Polo demais, durante a xornada haberá un xantar popular con produtos da Terra de Montes na Carballeira do Campo do Medio que xa ten os seus convites á venda a un prezo de 17 euros de xeito anticipado ou 19 –10 para os nenos– no mesmo día. As reservas poden facerse nos teléfonos 659 908 745 ou 684 126 649. Tamén haberá polbo á feira a un prezo de 10 euros.
En representación do colectivo veciñal, Fátima Fernández explicou que a xente de Sabucedo “está a traballar arreo e con moita participación para que todo volva ser un éxito e ademais incorporamos pequenos detalles nas actividades que fan que en cada edición todo saia mellor”, polo que quixo convidar a todos os veciños das parroquias e dos concellos limítrofes a “gozar dunha xornada especial de Samaín nunha aldea que sempre acolle a todo o mundo cos brazos abertos”.Henrique Bazal, presidente de Rapa das Bestas, engadíu que a MUSA “reúne todos os ingredientes dunha festa familiar en torno ás nosas tradicións e serve para demostrar a nosa aposta e cariño polo medio rural e pola dignificación e dinamismo da vida na aldea e no interior de Galicia”.
