O retorno de Suso de Toro

O escritor compostelán presenta 'Fóra de si', a súa primeira novela en sete anos após “recuperar" a súa "fe" na literatura

Suso de Toro pon fin a case oito anos de “seca literaria”. O autor natural de Compostela presenta a súa última novela, Fóra de si, unha obra que presenta a un neurocirurxián que atravesa un complicado momento persoal e se atopa totalmente sobrepasado polos seus problemas, ficando mesmo “fóra de si”, como o propio título da novela indica. Suso de Toro trata diferentes cuestións vencelladas á perda, a culpa e a identidade familiar.

- Publicidade -

O escritor permaneceu sete anos afastado do eido literario, optando por retomar a docencia

O escritor compostelán anunciara no ano 2010 a súa decisión de abandonar o mundo literario, xa que perdera a “fe” na literatura por mor da “crise da figura do autor” que acecha ao eido cultural. Durante este tempo, decidiu volver á docencia impartindo aulas a diferentes cursos no IES Rosalía de Castro, un centro no que ficou até a súa xubilación. Así e todo, non deixou de colaborar con diferentes medios amosando a súa visión do taboleiro político.

Suso de Toro recupera a “fe” na literatura

Agora, após o seu longo descanso, volve embarcarse no vertixinoso mundo da literatura. Suso de Toro recuperou a “fe” perdida ao ver o “estreito lazo” que xerou durante anos entre el mesmo e os seus lectores e lectoras. “A idea da novela xurdiu hai un ano e medio e decidín afrontar o desafío; gústanme os retos”, indica o escritor, quen asegura ter “desfrutado moito” durante a construción do relato.

Un dos mestres da escrita galega está de volta, con moitas novidades, pero mantendo o seu “ADN taurino. Precisamente foi o emblemático edificio de San Clemente, que garda un significado “moi especial” para De Toro, o lugar escollido para facer unha primeira presentación do seu libro ante os medios de comunicación. A novela Fóra de si está editada por Xerais, e será presentada nun acto público o vindeiro 2 de marzo na Sala Numax, a partires das 20.00 horas. Polo de agora, o que se pode garantir é que De Toro volveu máis forte ca nunca á primeira liña e fíxoo para quedarse.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego