A Plataforma cidadá “Queremos galego” reivindicou hoxe en Santiago, co lema “en galego sen límites”, o uso normalizado da nosa lingua. A manifestación comezou na Alameda compostelá ás 12 horas e á cita acudiron tamén algunhas formacións políticas como En Marea, o BNG, o PSdeG e Causa Galiza. O presidente da Mesa e portavoz de Queremos Galego, Marcos Maceira, explicou aos medios o obxectivo da protesta.

Na manifestación de “Queremos galego” en Compostela tamén participaron representantes de varias institucións como a vicepresidenta da Deputación da Coruña, Goretti Sanmartín, o deputado de Cultura da Deputación de Pontevedra, Xosé Leal, o alcalde de Santiago, Martiño Noriega e o concelleiro de Normalización Lingüística do concello de Pontevedra, Alberto Oubiña.

Varios colectivos relacionados co ensino tamén participaron na manifestación. Nós Televisión falou con Fernando Lacacio, vicepresidente da Confederación de ANPAS galegas, e Vero Rilo da Escola en Galego Semente.

O acto final rematou na Praza da Quintana onde a actriz Isabel Risco presentou aos regueifeiros Bieito Lobariñas e Josiño da Teixeira, a actuación de Belem Tajes, os Gaiteiros AntiLomce e a intervención de varias persoas de ámbitos diversos que explicaron a situación do galego nas súas profesións. O voceiro de Queremos Galego e presidente da Mesa pola Normalización Lingüística, Marcos Maceira, pechou cun discurso no que denunciou que “a lingua galega non é un complemento senón que se trata dunha necesidade para o pobo galego”.