O BNG arrancou ante o CHUS unha campaña informativa e de apoio á sanidade pública na que urxe a unha rectificación da década de recortes e privatizacións do Goberno de Alberto Núñez Feijóo, ao tempo que realizou un chamamento para participar de xeito masivo na manifestación convocada pola plataforma SOS Sanidade Pública.
Coa porta de entrada ao sistema sen medios suficientes, a consecuencia inmediata é o colapso do servizo de urxencias nos centros hospitalarios de todo o país, desde o CHUAC, Montecelo, Hospital do Salnés ou o propio CHUS, “no que volvemos ver o espectáculo dos e das doentes amoreadas nos corredores en cadeiras e padiolas, onde son atendidos sen a debida intimidade nin confidencialidade”, criticou Prado.
No caso concreto do hospital de Compostela a situación de saturación prodúcese despois de ter pechado 30 camas no centro Gil Casares, “colapsando urxencias e o servizo de medicina interna que, con 72 camas, a información que temos é que hai 116 persoas e outras esperando para poder ingresar”. “Os recortes teñen consecuencias”, conclúe Prado, reiterando o chamamento a participar na manifestación.
