O vindeiro 25 de abril, a praza da Quintana converterase en algo semellante a un ximnasio ao aire libre.
Segundo ano consecutivo
O Concello de Santiago celebra, por segundo ano consecutivo, o Día da Educación Física na Rúa, unha xornada que ten como obxectivo concienciar á mocidade sobre a importancia de practicar deporte, “especialmente nas idades máis temperás”, segundo afirmou a concelleira de Deporte, Noa Morales. As actividades desenvolveranse entre as 9.30 e as 14.00 horas, e participarán delas arredor de 850 estudantes de sete centros escolares da cidade, repartidos en tres quendas.
Este evento celebrouse por vez primeira no ano 2011 da man de Fran Flórez, profesor dun instituto asturiano. Nesa primeira edición participaron 125 alumnas e alumnos; este ano, estímase que a cifra roldará as 30.000 persoas en todo o Estado. Álvaro Rivas, mestre de Educación Física no IES Rosalía de Castro, reclama máis horas desta asignatura en Primaria e Secundaria para “seguir as recomendacións da Organización Mundial da Saúde”.
