Máis de 140 asociacións e colectivos da Península asinan un manifesto que esixe a fin dos campionatos e batidas de raposos en Galicia e, en concreto, o que terá lugar este sábado nos concellos lucenses de Portomarín, Guntín , Paradela e Monterroso.
O manifesto, que xa se lles entregou ás corporacións locais destes catro concellos, pide que os municipios amosen o seu rexeitamento a estes campionatos, como ocorreu en Poio, e soliciten á Xunta que non outorgue ningún permiso máis para estas matanzas no seu territorio. Nestes momentos, aínda se están engadindo mási asociacións.
As entidades destacan no documento os 75.000 raposos mortos nas últimas seis tempadas de caza en Galicia. “O raposo é un regulador necesario no medio natural, sanea as poboacións e limita a superpoboación doutros animais. Con todo, o seu papel no ecosistema é absolutamente ignorado por aqueles que deberían protexelo”, destacan. “Este acto de caza non só é inhumano e cruel, senón tamén é totalmente ilóxico e amosa unha enorme incomprensión e descoñecemento da ecoloxía básica”.
Entre os colectivos asinantes atópase a Plataforma pola Convivencia Ética coa Fauna Silvestre, ADEGA, Verdegaia, Agrocuir, Aloia Protectora de Animales Tui, Amigos da Terra , Aministía Animal, Asociación LIBERA!, Asociación Monte Galego, Coa Crea, Lugo sen Mordazas, Modepén Lugo, Plataforma Auga Limpa Plataforma Como Eliminar os Eucaliptos de Galiza, Plataforma Salvemos a Comarca de Ordes, Plataforma Salvemos Catasós, Sindicato Labrego Galego, Equo ou En Marea.
