O Sindicato Labrego Galego vén de denunciar á empresa Reny Picot por unha práctica “que roza a fraude” por ofrecerlle ás granzas que lle abastecen de leites novos contratos por tres meses. Isto, para a central sindical agraria, significa: “extorsión das industrias ás granxas aproveitándose da súa posición de dominio na cadea de valor”.

Ademais, segundo denuncia o SLG, a empresa está avisando da posibilidade de que, ao pasar estes tres meses, sexa probable que haxa que baixar os prezos nos novos contratos que se fagan a partir de entón. “Daquela, é doado sospeitar que Reny Picot está a forzar contratos de tres meses e non dun ano, como obriga a lei, para poder baixar o prezo despois e aforrarse as marxes de nove meses que debería pagar aos prezos actuais se asinase contratos de un ano”, sosteñen.

Este cambio de actitude de Reny Picot coincide co estoupido da crise polo COVID19, xa que os contratos que estaba asinando antes da emerxencia sanitaria estaban a ser por períodos de un ano.”Parece que coa escusa de garantir o acceso á alimentación da cidadanía as industrias lácteas queren facer o seu agosto, pois esta nova coincide con outras como a baixada de prezos que se está a impoñer no leite ecolóxico. Trátase de feitos inadmisibles nun contexto, como o actual, no que se disparou a demanda e no que a industria láctea no dá abasto, tal como acontece con determinadas empresas que viron incrementada a demanda de leite, aumentando a frecuencia do transporte e dobrando quendas; ou demandando novas explotacións para garantir a produción”.