O PSdeG reclama “mellores condicións” para o aeroporto de Lavacolla

Paco Reyes esixe a implantación das rutas internacionais pendentes, a baixada das taxas e as lanzadeiras dende tódalas cidades galegas

Andrés Terraza

As boas cifras de tránsito ás que nos tiña acostumado o aeroporto de Lavacolla estanse a frear nas últimas datas. O pasado mes de abril rexistrouse unha baixada do 4’3% con respecto ao 2017, unha tendencia contraria á das outras cidades galegas. Asemade, aínda non se implantaron a meirande parte das 22 rutas internacionais prometidas. Esta cuestión preocupa ao grupo municipal socialista, que no vindeiro Pleno pedirá ao alcalde unha explicación.

- Publicidade -

As taxas de Lavacolla son case un 40% superiores ás de Alvedro e Peinador

Outra cuestión que sacará a debate o voceiro local do PSdeG-PSOE, Paco Reyes, é que Aena estude unha baixada das taxas de Lavacolla, que son “case un 40%” superiores ás de Alvedro e Peinador. Así e todo, o concelleiro socialista insta á Xunta a que conceda as licenzas para conectar o aeroporto compostelán co resto das cidades do país, unha conexión xa existente coa terminal de Porto, Sá Carneiro.

Nas últimas datas, o alcalde de Vigo, Abel Caballero, instou á Xunta a dotar ás catro terminais galegas de maior autonomía e poder de decisión. Para Paco Reyes, esta podería ser unha boa proposta se a Lavacolla se lle desen as “ferramentas precisas” para lograr a súa “autonomía total”.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego