Todos os grupos con presenza na Cámara galega apoiaron unha proposición de lei presentada por En Marea que pide a modificación da normativa do Imposto do Valor Engadido (IVE) para que se aplique o tipo hiperreducido aos produtos relacionados coa menstruación como as compresas ou os tampóns. Agora, será remitida ao Congreso dos Deputados, que deberá posicionarse con respecto a reclamación do Parlamento galego.

“Partimos desa desigualdade polo feito de sermos mulleres”

A proposta está enmarcada na defensa da igualdade, dado que as mulleres, polo feito de selo, utilizan determinados produtos de hixiene que constitúen un importante desembolso económico. A deputada de En Marea encargada de defender a proposta, Paula Verao, afirmou que se trata dunha medida de xustiza social: “Partimos desa desigualdade polo feito de sermos mulleres, polo que é xusto os produtos de hixiene feminina sexan gravados co tipo súper-reducido do 4%, fronte ao reducido do 10% actual”.

“Os produtos relacionados coa menstruación, usámolos as mulleres uns 35-40 anos de media. Ditos produtos poden chegar a ter uns custes moi elevados ao mes. Só falando dos usados para a menstruación, poden supor 20 euros mensuais, o que para mozas sen emprego ou persoas en risco de exclusión social é un custe moi elevado” continuou Paula.

O que propón En Marea é modificar a lei, elevar ao Congreso unha proposta de modificación da Lei 37/1992, de 28 de decembro, do Imposto sobre o Valor Engadido, para blindar esta medida como estrutural e perdurable no tempo.

Alternativas ecolóxicas

Paula Verao tamén mencionou a necesidade de avanzar no abaratamento e posta en coñecemento das alternativas ecolóxicas a estes produtos, gravando estes produtos co tipo súper-reducido, para avanzar na loita contra os residuos e na sustentabilidade ambiental: “incluímos, pois, non só as compresas, tampóns e salvaslips, contemplados ata o de agora co IVE reducido, senón tamén novos produtos reutilizables, copas menstruais e, tamén, os xeles de uso íntimo”.