O deporte galego segue a acadar novos éxitos. No fútbol gaélico, un deporte que se comezou practicar no país hai 8 anos, estase a atopar un auténtico filón, xa que a Selección Galega feminina vén de proclamarse vencedora do primeiro Campionato Europeo desta disciplina, celebrado a pasada semana na localidade bretoa de Lorient —An Oriant en bretón—. Nós Televisión conversa con tres das protagonistas, Laura Nercellas, Sonia Sobral e Nazaret Touceiro, tralo seu regreso a terras galegas.

- Publicidade -

Vitoria por duplicado

Logo de superar a fase de grupos con pleno de vitorias ante Alemaña, Francia e Bretaña, as galegas enfrontáronse ao combinado galo nunha intensa final na que remataron a primeira parte por detrás no marcador. Porén, Galicia remontou e se alzou coa vitoria en dúas ocasións. Si, en dúas, por mor dun erro arbitral: “Faltaban cinco minutos e estabamos perdendo, pero anotamos dous goles e gañamos; porén, o árbitro trabucouse e deu un empate, polo que tivemos que voltar ao campo e gañar de novo a Francia nos últimos intres”, apunta Laura Nercellas.

O fútbol gaélico, aos pés de Galicia

Conversamos coa Selección Galega de fútbol gaélico após a súa vitoria no Europeo celebrado en Lorient

Publicada por Nós Televisión en Martes, 14 de agosto de 2018

As xogadoras da Selección nacional pensan xa na vindeira cita internacional: o Mundial que se celebrará en 2019 na capital irlandesa, Dublín. Asemade, fan un chamado á mocidade galega para que practique este deporte e comece “facer canteira” de cara ao futuro. Semella que estes non serán, nin moito menos, os últimos fitos dunha xeración privilexiada de xogadoras dun deporte en constante crecemento.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego