O triplo asasinato de mulleres ocorrido este ano en Valga volveu emerxer a reivindicación dunha nova forma de contabilizar os asasinatos machistas. Académicas e activistas sociais vinculan este novo camiño a percorrer coa inclusión do termo feminicidio que, entre outras, visibiliza na súa propia raíz o exterminio das mulleres a mans do patriarcado.
O feminicidio non é unha lacra social senón un problema estrutural. O feminicidio é todo asasinato cometido en contra dunha muller que se puido ter evitado, un concepto que no mundo académico xerou a antropóloga Marcela Lagarde. En Galiza, unha das figuras máis representativas na loita polo recoñecemento do feminicidio é Carme Adán, autora de ‘Feminicidio. Unha nova orde patriarcal en tempos de submisión“.
Na práctica, tradúcese en centos de casos de violencia machista que fican fóra do recoñecemento institucional. Hai pouco máis de dous meses, un home matou a tiros á súa exparella, á súa exsogra e á súa excuñada na parroquia de Cordeiro, en Valga. Delas, só foi considerada vítima de violencia machista á muller que mantivera unha relación sentimental co seu asasino. Isto non só invisibiliza boa parte dos crimes machistas que están acontecendo senón que promove a desprotección institucional e a impunidade social destas agresións. Dende a plataforma Feminicidio.net contabilizan 93 feminicidios e asasinatos de mulleres no estado español no que vai de ano mentres que o goberno español recoñece oficialmente 51 crimes machistas.
