A Asociación de Pacientes e Usuarios do CHUS volve denunciar colapsos nas urxencias do hospital compostelán. O día 2 de xaneiro, unha decena de persoas tiveron que esperar durante horas nos corredores de acceso a ser atendidos en cadeiras de rodas e padiolas. Mesmo un paciente terminal, segundo denuncian, “permaneceu mais dunha hora no corredor ata pasar a sala de observación”. No momento máis crítico, os pacientes chegaron a ter que ocupar zonas de traballo mentres esperaban ser trasladados a planta.
“A pesares desta situación que atenta contra a nosa dignidade como pacientes a xerencia segue mantendo pechadas as 40 camas de medicina interna do Gil Casares e o anexo a ese edificio“, denunciaba un usuario á Asociación. “Despois de meses de folga do persoal sanitario do servizo e do aumento de medios humanos, os pacientes seguimos sendo vítimas do maltrato asistencial porque non se poñen os medios necesarios para que as camas estean dispoñibles”.
Os traballadores de Urxencias do Hospital Clínico levan máis dun ano denunciando esta situación. Mentres, as listas de espera continúan a aumentar, e cada vez collen máis forza no centro hospitalario multinacionais privadas como Medtronic, algo que a propia Asociación de Pacientes leva tempo denunciando.
