Colectivos veciñais de máis de 16 concellos reuníronse hai unha semana en Compostela para constituír a ‘Rede galega por un rural vivo’ segundo informaron este xoves á prensa. O propio nome do colectivo recolle o obxetivo principal, “garantir un marco legal xusto e con garantías para que o rural non esmoreza”.
A Rede Galega por un Rural Vivo está composta por colectivos veciñais que se enfrontan a proxectos eólicos abusivos e que unen forzas para “a visibilización e denuncia do espolio que sufre o rural”. Neste senso, apuntan a que se está a empregar o rural galego “como un parque industrial” sen ter en conta as “graves” consecuencais para a supervivencia do rural, “condenándoo a un futuro moi incerto e a unha acelaración do despoboamento”.
Os colectivos veciñais da rede non están en contra da enerxía renovable senón do modelo de produción enerxética. “Este modelo productivo empobrece ás localidades onde se xera a enerxía e reduce o potencial crecemento destas áreas que a miúdo contan coa paisaxe e o entorno natural como reclamo económico e de benestar social, o que axuda a crear negocio localmente e asentar poboación, cousa que os proxectos eólicos destas empresas multinacionais non poderán achegar nunca á comunidade rural”.
Fronte a este sistema, a Rede tamén procurará estudar e divulgar outras formas de produción de enerxía máis xustas, como o autoconsumo ou a produción de enerxía colectivizada para consumo local. Os obxectivos da Rede A Rede Galega por un Rural Vivo vai traballar para conseguir un marco legal que protexa a vida no rural evitando así “escenas esperpénticas como un aeroxenerador de 200m de altura a tan só 500m das casas, ou liñas eléctricas que cruzan fragas centenarias”.
