Medra a preocupación polo futuro medioambiental de Compostela

Máis de 200 persoas participan no primeiro gran acto da rede unitaria de plataformas da contorna de Compostela en defensa do medio ambiente

Imaxe cedida

O pasado martes tivo lugar o primeiro acto da recén constituída Rede de Plataformas
Compostela– Ulla – Tambre.

- Publicidade -

Unhas 200 persoas acudiron ao Pazo do Faramello a un acto no que a nova Rede expuxo os motivos da súa creación e presentou diante do público algúns dos problemas que afectan a comarca compostelá en cuestións de medio ambiente, saúde e economía.

Entre o público atopábase unha importante representación de políticos de case todas as forzas e ideoloxías, mesmo dispares, como os deputados Paula Prado (PP), Xosé Luis Rivas “Mini” (BNG), Paula Quinteiro e Marcos Cal (Marea), os alcaldes de Santiago de Compostela e Teo, varios concelleiros da comarca.

Os casos da mina de Touro–O Pino, a explotación de Erimsa en Mesía e Frades, os vertedoiros de Miramontes e de Lesta, o caso múltiple de Casalonga, a destilería de Rois, os eólicos e as liñas eléctricas de Ordes ou a loita por recuperar o Sar foron expostos a un público que e na súa maioría era consciente por primeira vez dos seus efectos directos e dos acumulados.

Imaxe cedida

Máis actividades

Os organizadores amosaron a súa satisfacción tanto pola afluencia de público ao acto como polo interese suscitado en todas as forzas políticas e confían que os traballos de análise e difusión desta problemática contribúan a un aproveitamento mais equilibrado dos recursos naturais, a unha planificación real das estratexias económicas e a una planificación coherente das infraestruturas e o territorio.

Ademais, tamén informaron que convocarán máis actos para facer chegar estas reflexións e accións ao resto dos 51 concellos e aos máis de 400.000 habitantes afectados.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego