Máis dun milleiro de nenas e nenos optan en Compostela ás bolsas escolares

O Concello outorgará bolsas nas modalidades de comedor, actividades extraescolares e material escolar

O Concello de Santiago presentou hoxe os resultados da convocatoria de bolsas municipais escolares para o curso 2018/19. Desta volta, 1196 nenos e nenas de entre 3 e 12 anos optan a estas axudas, é dicir, o 14% do censo total das persoas comprendidas nesta franxa de idade.

- Publicidade -

Tres modalidades de bolsas

Neste curso, o Goberno local incrementou a contía a 585.900 euros, multiplicando por seis o orzamento do ano 2015. Como novidade, cómpre salientar que o Concello outorgará estas subvencións nas modalidades de comedor, actividades extraescolares e material escolar. As bolsas para material escolar consistirán nun pago único de 60 euros, namentres para actividades extraescolares haberá unha contía fixa de 30 euros. No tocante ao comedor, o máximo será de 90 euros ao mes.

Prazos

Dende Raxoi informan que as persoas solicitantes terán do 8 ao 23 de agosto para emendar documentación. Asemade, “para presentar o certificado de ter reserva de praza no centro escolar será suficiente con que no prazo anterior presenten unha declaración xurada ao respecto, dado que en agosto os centros están pechados”.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego