A Inspección de Traballo da Seguridade Social vén de pedirlle á Xunta de Galiza que faga test a todo o persoal e residentes cando haxa sospeita dun positivo segundo informaba este martes a Confederación Intersindical Galega (CIG). O sindicato presentara denuncia ante esta Inspección o pasado 18 de marzo ao considerar que o Goberno galego “non estaba a tomar ningún tipo de medidas de protección” fronte o virus nas residencias de maiores, centros de menores e persoas dependentes.

- Publicidade -

No documento, emitido por Inspección, exíxese ademais o establecemento de medidas de protección ao persoal traballador de forma que se garanta a súa seguridade fronte o risco de infección polo COVID 19, entre as que está EPIS adecuados, protocolos, formación ou test masivos.  A nivel xeral, a CIG valora positivamente as medidas requiridas no documento da Inspección, malia considerar que “chegan tarde”.

Neste sentido denuncia que “por mor da falta de medidas preventivas aplicadas con celeridade pola Xunta, na actualidade existen casos de persoas contaxiadas polo COVID-19 en case todos os centros”. Porén, subliña, “a día de hoxe a Xunta segue sen informar do número real de persoas infectadas (traballadoras e usuarias ) a pesares de que no mesmo requirimento establece esa obriga”.

A CIG conclúe que este requirimento vén confirmar a “ineptitude e inacción da Xunta de Galiza na xestión dos centros sociais residenciais. Máis cando estamos a ver o que sucedeu nas residencias de maiores de Madrid ou Cataluña”. Por iso a central sindical non entende como “un mes despois de que comezáramos a demandar medidas siga sen actuar obrigando ao persoal a traballar sen EPIs nin protocolos preventivos e teña a pouca vergonza de xogar coa saúde do seu persoal e dos nosos maiores para facer campaña política”.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego