O vindeiro domingo 16 de xuño unha nova mobilización percorrerá a chamada autovía entre Marín e Pontevedra en contra da permanencia de ENCE na Ría. A empresa de pasta de papel debería ter abandonado os terreos de dominio público que ocupa na actualidade en xullo de 2018, como sinalaron as institucións xudiciais.

A fábrica de ENCE en Lourizán (Pontevedra), emprazada en terreos de dominio público, estaba obrigada a abandonar a ocupación da ría en xullo 2018, tal como esixía a Lei de Costas de 1988. Porén, a reforma da Lei en 2013 abriu a porta á ampliación das concesións e tres anos despois, en xaneiro de 2016, o goberno en funcións de Mariano Rajoy prorroga a concesión a ENCE ata 2073, unha decisión que tanto Greenpeace como a APDR consideraron cando menos irregular.

Recursos na AN

APDR e Greenpeace presentaron senllos recursos diante da Audiencia Nacional contra a devandita orde para evitar que Ence Enerxía e Celulosa S.A. permanezan na ría de Pontevedra outros 60 anos. En 2019 o Goberno do PSOE anunciou que non seguirá adiante na defensa da prórroga da concesión de ENCE diante dos tribunais.

- Publicidade -