Feijóo evita aclarar o seu futuro

O presidente galego asegura que seguirá a cumprir a "axenda da Xunta" e non responde con claridade se ficará en San Caetano ou porá rumbo a Madrid

Trala dimisión de Mariano Rajoy como presidente do Partido Popular, o futuro de Alberto Núñez Feijóo está no aire. Este mércores, o presidente galego foi abordado polos medios de comunicación á súa saída do Parlamento e, preguntado acerca das súas aspiracións políticas, asegurou estar centrado unicamente na “axenda da Xunta”, xa que aínda non hai un congreso convocado polo PP.

Críticas da oposición

A falta de claridade nas verbas de Núñez Feijóo alerta aos partidos da oposición, que, no Pleno de hoxe, instaron ao dirixente a “decidir” o seu futuro e non empregar Galicia como “sala de espera” para coller o seu “voo” a Madrid. Antón Sánchez, vicevoceiro de En Marea, considera que Feijóo representa “máis do mesmo” dentro da formación conservadora.

A repentina saída de Rajoy sitúa como favoritos para a sucesión os nomes de Soraya Sáenz de Santamaría, María Dolores de Cospedal e o propio Núñez Feijóo. Segundo a opinión de diferentes analistas da política de Madrid, o mandatario galego sería quen posúe máis “papeletas” para ocupar o posto.