A conselleira de Infraestruturas e Mobilidade Ethel Vázquez presentou hoxe no Parlamento o Proxecto de lei para optimizar a xestión do abastecemento da auga.
Na súa presentación da proposta, centrouse en responsabilizar aos concellos polo alto índice de fugas nas redes de abastaecemento, que poden chegar ata o 40%, e lembrou -mapa en man- que Galicia é “a cuarta comunidade autónoma con maiores perdas anuais, máis de 55.500 millóns de litros.” Tamén adiantou que os concellos deberán facer en menos de dous anos, auditorías das redes de abastecemento.
David Rodríguez, do Grupo Mixto, di que moitos concellos non teñen cartos para facer ese plan, e pediu axudas en lugar de sancións. Ademáis criticou que no texto se fale de “reducir os caudais ecolóxicos aos ríos” e de que non se poña límites ás esixencias das eléctricas: “a auga non é un negocio”.
Luis Bará, do Bloque Nacionalista Galego, tamén criticou as sancións aos concellos que recolle o Proxecto de lei: “Saben o que se lles ven enriba a concellos como Ribeira ou A Estrada? Cando o saiban van botar as mans á cabeza”. Bará foi o máis incisivo ante a proposta da Consellería: cualificou as “solucións paliativas, e non reactivas” do texto e comezou criticando a parálise da Xunta citando a canción Aute: “pasaba por aquí, pasaba por aquí”.
O PSdeG centrouse en criticar a xestón “nefasta” de Augas de Galicia e criticou que esta deixase de empregar moitos fondos na mellora da xestión da auga. Tamén amosaron o seu enfado porque a prensa se enterase do contido da proposta antes que os deputados e deputadas da oposición.
A lei de medidas que garanta o abastecemento en episodios de seca e en situación de risco sanitario xorde dun novo contexto de cambio climático, mais desde a oposición recrimináronlle que se fale de cambio climático despois de ter sido negacionistas do mesmo durante moitos anos e criticaron que no Proxecto de lei se obvie dun xeito serio a cuestión, como sinalaba Marcos Cal, de Comúns da Esquerda.
Tanto Cal, Bará coma David Rodríguez lembraron nas súas intervencións, dun xeito ou outro, que a auga non é un ben co que se deba facer negocio.
