Este mes de xuño cúmprese un ano da renovación da dirección nacional de Esquerda Unida, nunha Asemblea na que Eva Solla foi elixida coordinadora do partido e Rubén Pérez secretario de Organización. Pérez, voceiro da Marea de Vigo, fai balance dun ano “intenso”, do que salienta a continua aposta de EU polos proxectos de “unidade electoral”.

Para a organización de esquerdas é unha “prioridade” cumprir coa “demanda histórica” de acadar acordos “plurais e amplos”, nos se que inclúan diferentes formacións políticas para conformar un “partido instrumental” de cara ás vindeiras eleccións municipais. Neste senso, Rubén Pérez lembra a importancia de atopar un novo “marco político” que permita a “unidade” das coalicións electorais que se presenten en cada concello para, deste xeito, “dar a batalla en cada Deputación”.

Maior “implicación” de Podemos

Para o 2019, Pérez considera que o acordo asinado entre Podemos, Izquierda Unida e Equo será “moi positivo” e contará cunha “maior implicación” da formación morada. Así e todo, salienta que as marcas políticas máis consolidadas como Compostela Aberta ou Marea Atlántica manterán a súa denominación actual.