Falamos con Hélio, de Avante LGTB, entidade que organiza encontros abertos para falar da visibilidade bisexual, co fin de analizar as experiencias individuais e reflexionar sobre a situación do colectivo. Haberá unha asamblea aberta en Compostela o mércores 25 e un café para compartir experiencias en Pontevedra o xoves 26.
Este mércores día 25 esperámoste para a gran Asemblea Aberta de inicio de curso.
Ao rematar a Asemblea contaremos cun espazo de convivio para coñecernos mellor nun ambiente de ocio. O Pub Curruncho ábrenos as súas portas para celebrar o día da visibilidade bisexual. Non faltes! pic.twitter.com/m2IqpOs4ML— Avante LGBT+ Compostela (@AvanteCompos) September 22, 2019
Hélio xustifica a necesidade destas xornadas e do Día da Visibilidade Bisexual, xa que segue sendo un colectivo estigmatizado e invisibilizado: “As persoas bisexuais somos un pouco invisibles (…) Entre persoas heterosexuais, non somos heterosexuais”, en referencia a unha suposta indefinición da súa orientación sexual. “É unha saída do armario constante”.
Ademais, Hélio recoñece que “nos espazos LGTB tamén hai un certo estigma, sobre todo con lesbianas e gays”. Para Hélio, son relativamente habituais -malia que son “unha minoría”- comentarios obxectores da súa orientación: “Ti es un pouco hetero…”. Critica ese cuestionamento e reafirmación constante, lembrando que “ninguén ten que demostrar ser bisexual”.
Malia esta situación de invisibilidade e loita contra tópicos, desde Avante LGBT son optimistas con respecto ás novas xeracións e recoñecen que son as persoas adultas as que máis estigmas teñen coas bisexuais.
