Achégase outubro e, con este mes, a primeira gran cita do cinema en Compostela: o Festival internacional Curtocircuito.
A decimocuarta edición terá lugar entre os días 1 e 8 e trae, como en anos anteriores varias novidades que se presentaron en rolda de prensa esta mesma mañá no Pazo de Raxoi.
Nas diferentes intervencións, protagonizadas polo alcalde de Santiago, Martiño Noriega, acompañado pola vicepresidenta da Deputación, Goretti Sanmartín, o xerente de Agadic, Jacobo Sutil e o director do festival, Pela del Álamo, quedou claro que este é xa unha cita consolidada para o audiovisual no noso país.
martiño Noriega sinalou a empatía que este evento ten coa cidade
A vicepresidenta da Deputación da Coruña, Goretti Sanmartín, explicou que Curtocircuito é un festival especial que implica a todo o sector audiovisual galego, un encontro sólido no panorama cinematográfico do país. Para o xerente de Agadic, Jacobo Sutil, este festival fomenta a creación de públicos e obras diferentes e facilita a participación galega a través da sección Planeta GZ na que participarán nesta edición cineastas como Tono Mejuto, Jione Camborda, Adrián Canoura e Fon Cortizo.
O director do festival salientou a creación dunha nova sección que levará o nome de “Arredor do son”.
