O 21 de outubro chega a edición 17 da Semana de Cine Euroárabe Amal. Presentárona o seu director, Ghaleb Jaber Martínez, xunto a Anxo Lorenzo, director xeral de Políticas Culturais.
O festival ten coma un dos obxectivos principais o rexeitamento de prexuízos cara o mundo árabe, aínda estigmatizado na nosa sociedade: “Pensamos aquí o facemos todo moi ben e alí moi mal, que os árabes son un salvaxes que non teñen dereito á democracia ou a unha vida pacífica porque entre eles se matan”, ironiza Ghaleb Jaber, que lembra que detrás dos conflitos en Oriente Medio sempre hai intereses lucrativos por parte de occidente.
Tamén sinalou cara unha “atomización” dos países árabes provocados polos países occidentais “portaminas e delineantes”, que debuxan fronteiras baixo os seus intereses, “como xa fixeron en África”.
Pon como exemplos aos países protexidos polos Estados Unidos, como Arabia Saudita, “os máis restrictivos en canto a dereitos” co consentimento de occidente e doutra banda ao Iémen, que “ten unha cultura riquísima” pero que é un país que sofre a diario abusos e unha guerra sen que “os medios internacionais se fagan eco do problema”.
O festival, do 21 ao 25 de outubro
Arrancará co documental “La guerra empieza aquí”, que conta como un bombeiro vasco se negou a participar nun operativo para enviar toneladas de armas fabricadas en Euskadi a Arabia Saudita, precisamente para atacar ao Iémen. Tralo documental, haberá un coloquio sobre o negocio da venta de armas.
Tamén se proxectará “Hamada”, un documental do galego Eloy Domínguez sobre a vida nun campamento de refuxiados no Sáhara. Haberá filmes de Exipto, Palestina, Líbano ou Francia.
Anxo Lorenzo, director xeral de Políticas Culturais, salientou a oportunidade que supón o Amal de ver cine “que vai máis alá do comercial” e xa o considera un clásico do cinema galego, programado entre o Curtocircuito e o Cineuropa.
