Encontros ao vivo. Este é o nome que levarán os actos deseñados desde o goberno municipal para completar os procesos de participación cidadá. A iniciativa presentouna esta mañá, en rolda de prensa, o alcalde de Santiago, Martiño Noriega.
Nestes encontros participarán todos os concelleiros e concelleiras do Goberno local como sinalou Martiño Noriega. Desde o Concello pretenden, deste xeito, establecer un novo contacto directo cunha cidadanía que pode, directamente, formular “novas demandas ou expresar as súas opinións”
As xuntanzas terán lugar un sábado de cada mes pola mañá na rede de centros socioculturais. O primeiro terá lugar o 25 de febreiro no Centro Sociocultural de Fontiñas a partir das 11:30 horas. Estará dirixido á zona Urbana Nordeste, que agrupa as zonas de Belvís, Fontiñas, San Pedro, San Lázaro, Amio, Viso, Monte dos Postes e Camiño Francés.
