Chamamento para que o Pleno de Ordes declare o concello libre de parques eólicos

A Coordinadora contra a Implantación de Parques Eólicos na Comarca solicitou aos partidos políticos a que ratifiquen unha declaración institucional

O Pleno municipal do concello de Ordes que terá lugar o 1 de xuño podería apoiar a non construción de parques eólicos na comarca. Esta é a intención da Coordinadora contra a Implantación de Parques Eólicos que fixo un chamamento ás diferentes forzas políticas representadas nese municipio para que asinen unha declaración institucional que tamén se presentará noutros concellos.

- Publicidade -

“Consideramos imprescindible que se dea este paso para poder blindar a vida das veciñas e veciños, a nosa saúde, o noso Camiño de Santiago, a nosa actividade agraria e o noso medio ambiente e patrimonio, ante as intencións da empresa Green Capital Power de instalar diferentes parques eólicos na comarca e arredores”, sinalan nun comunicado desde a Coordinadora.

Recollen 1.500 sinaturas en 10 días contra a implantación de parques eólicos na comarca de Ordes

Apuntan que tiveron constancia de que no orde do día dese pleno figura como punto ratificar, se procede, a declaración institucional dos concellos de Frades, Mesía, Ordes e Oroso sen eólicos acordada hai varias semanas polos respectivos alcaldes. “Queremos chamar a PP, PSOE, UxO, BNG e Non Adscritos a debater o texto con responsabilidade e declarar unanimemente que as condicións socio-económicas dos nosos concellos e as características dos nosos territorios fanos non aptos para este tipo de instalacións”.

No comunicado a Coordinadora vai máis alá e esixen que a Xunta reforme “o Plan Eólico de Galicia e que a Consellería de Economía, Emprego e Industria elimine estes concellos do citado Plan”.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego