A Casa Cornide, un edificio histórico coruñés de estilo barroco situado en pleno casco histórico, forma parte do patrimonio espoliado por Franco trala fatídica Guerra Civil. Menos coñecido que o Pazo de Meirás, ten un especial significado para a cidade posto que chegou a acoller diversos usos públicos para rematar, directamente, nas mans de Carmen Polo, muller do ditador.
Patrimonio municipal?
O concello da Coruña a finais do mes de xaneiro deste ano constituía o Consello Municipal da Memoria Democrática coa finalidade de promover a reparación moral e familiar das persoas que padeceron persecución ou violencia por razóns políticas, ideolóxicas ou de crenza relixiosa a partir de 1936. A principal encomenda deste órgano consultivo é, precisamente, analizar a situación da Casa Cornide e traballar pola súa recuperación para o dominio público.
A Coruña estuda todas as posibilidades para a recuperación
As protestas para a recuperación da Casa de Cornide na Coruña van en aumento e son cada vez máis as voces que reclaman a súa devolución. É un auténtico pulso da cidadanía para que se cumpla a Lei da Memoria Histórica. E son cada vez máis as voces que esixen que o inmoble sexa outra vez público, unha posibilidade que cada día podería estar máis preto.
