O Pazo do Hórreo acolleu este mércores a primeira sesión de control ao presidente da Xunta tras as eleccións estatais e o preacordo de goberno entre o socialista Pedro Sánchez e líder de Unidas Podemos Pablo Iglesias. O voceiro do grupo de Grupo Común da Esquerda centrou a súa pregunta a Alberto Núñez Feijóo no “abandono, envellecemento e espolio” do rural galego. “Non se pode invertir esta tendencia sen unha aposta polo público, non se pode facer pechando escolas, quitando médicos e pediatras ou deixando sen facer os centros de día necesarios, eliminando os técnicos das oficinas agrarias ou os investigadores dos centros de investigación agrarios”, sostivo.

- Publicidade -

Para Antón Sánchez, “o que acontece no rural non é casualidade, é un proceso de destrución cultural, social e ambiental, no que as súas políticas son protagonistas”. Tamén aproveitou a ocasión para preguntarlle ao presidente da Xunta e líder dos populares galegos se vai seguir pactando con Vox, “esa forza racista, xenófoga e machista”. Unha liña na que afondo o secretario xeral do PSdeG, Gonzalo Caballero, que apelou ao pacto do PP con Vox e Ciudadanos en Andalucía que outorgou a presencia da Junta ao popular Juan Manuel Moreno Bonilla. “Non estou nada preocupado polo acordo subscrito”, chegara a dicir daquela Núñez Feijóo. Unhas palabras que Caballero lle lembrou hoxe ao presidente do Executivo galego no hemiciclo tras o gran ascenso de Vox nas urnas.

Fóra da sesión de control, a oposición levou ao Pleno cuestións como o desmantelamento da sanidade pública. Dende o Bloque Nacionalista Galego, a deputada Noa Presas esixiu unha atención pediátrica digna en relación aos déficit de servizo que está sufrindo a provincia de Ourense. A nacionalista deu unha cifra: hai 1.200 crianzas que están a espera de ser atendidas.

 

 

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego