“En liña coa estratexia da Xunta de Galicia e das empresas do sector alimentario, BFFood pon o foco nos mercados internacionais dende dous puntos de vista. En primeiro lugar, BFFood está preparada para aloxar proxectos procedentes de calquera rexión e país. En segundo lugar, os proxectos de BFFood recibirán o apoio adecuado para internacionalizarse e conseguir clientes nun mercado global”. Con estas palabras se anuncia o ‘Business Factory Food‘ (BFFood) que esta semana anunciou o comezo da súa segunda edición. Defínese como unha aceleradora do sector alimentario de Galicia co obxetivo de “consolidar novas empresas que acheguen solucións innovadoras ao mercado, consolidar o tecido empresarial e industrial do sector galego e atraer talento nacional e internacional”.

- Publicidade -

Nun momento no que o rural galego se atopa en pleno desmantelamento, e cunha urxencia de saídas económica e produtivas, non para de chamar a atención a creación desta aceleradora. Por un lado, está conformada por grandes compañías empresariais como Grupo Nueva Pescanova, Gadis, Capsa Food, Feiraco ou Calvo.

Non só participan as empresas senón que as persoas directivas das compañías adoptan un papel nesta aceleradora. Os directivos destas empresas exercen como mentores dos proxectos seleccionados e incluídos dentro deste BFFood. “Queremos abrirnos a novas ideas, a novas propostas, por parte das star-ups baseadas nos retos que propoñemos”, sostén o director de Nueva Pescanova, Juan José de la Cerda.

A maiores, contan cun comité técnico conformado polas tres universidades galegas, ANFACO ou mesmo a Fundación FEUGA. Mentres, o comité asesor está conformado pola Cámara de comercio de Compostela, Coremain ou a Asociación Empresarial do Tambre.

Os intereses da aceleradora quedan totalmente controlados pola patronal. De feito, os requisitos para a escolla de proxectos baséanse especialmente no “grao de innovación tecnolóxica e de negocio” ou no “risco asumido pola entidade promotora”, sen ter en ningún momento en conta as condicións sociais.

Os proxectos escollidos deben ser dez. Durante a chamada etapa de aceleración, poderán ter acceso a un fondo perdido de 25.000 euros outorgados polo organismo público GAIN ou ben poden obter un préstamo participativo de ata 50.000 euros por parte doutro organismo público, o XESGALICIA.

Como era de agardar, o financiamento do Business Factory Food recae na man de todas e de todos nós a través de tres organismos da Xunta: o GAIN, o XESGALICIA e de onde procede o maior capital, o IGAPE. Todo envolto nunha promoción da ‘cultura emprendedora’ que, na práctica, resulta un bufete libre para o empresariado financiado polo Goberno de Alberto Núñez Feijóo.

Segundo datos do Sindicato Labrego Galego, entre o 2015 e o 2017 pecharon máis de 1.000 granxas dedicadas á industria do leite en Galicia.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego