As vítimas colaterais da caza de bruxas do PP

Unha das empresas sobre as que o PP de Santiago está a sementar dúbidas desmente calquera trato de favor por parte do Concello de Santiago

“Somos unha empresa nova e traballamos sen enchufismo”. Esta mañá quixemos conversar cunha protagonista involuntaria do terremoto político que se vive no Pazo de Raxoi trala denuncia pública do PP.

- Publicidade -

Unha vinculación familiar que non existe

7H Sociedade Cooperativa Galega é unha empresa compostelá de mediación e creación cultural e está inserida na relación de empresas sobre as que o Partido Popular está a sementar dúbidas. Unha antiga socia da empresa é a irmá da actual concelleira de Deportes de Santiago, Noa Morales. Agora, desde a empresa aludida polo Partido Popular responden: “É certo que foi socia nos principios da cooperativa pero non o é desde finais de 2016”. Negan, en todo caso, calquera trato de favor por parte do Concello de Santiago polo que lles custa entender a polémica suscitada desde a mañá de onte: “Presentámonos sempre a licitación e a concorrencia competitiva”

Lamentan desde a empresa que se sintan “involucradas en liortas políticas” e din non comprender as razóns polas que teñen que xustificar os motivos polos que presentan proxectos no Concello de Santiago posto que desde a propia cooperativa realizaron, ao longo dos últimos anos, traballos para diversos concellos de diverso signo político, coas Deputacións e mesmo coa Xunta de Galicia.

Desde a pequena empresa compostelá, con sede na avenida de Romero Donallo, síntense perxudicadas por unha polémica sen pés nen cabeza. Desde a cooperativa traballan valores como a igualdade, a soliedariedade e o compromiso social e está conformada por creadoras, axentes e educadoras de moi distintas disciplinas. “Dáse a entender que non somos merecedoras de que contraten os nosos proxectos” resaltou a mesma Clara Rodríguez.

Nós simplemente queremos traballar

Ao longo da traxectoria desta cooperativa teñen recibido diversos recoñecementos da Xunta de Galicia como ou Premio Emprende Gaiás-Sixto Seco 2014 ou o Premio aos Valores Cooperativos no 2016 ou, máis recentemente, o Premio Begoña Caamaño outorgado este ano pola Deputación da Coruña polo proxecto Elas tamén Pintan. E claro, isto non. “É triste que non nos chamaran desde a prensa polo premio que nos deron e si por esta polémica” declarou Rodríguez ante as nosas cámaras

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego