A investigación xudicial polas verteduras contaminantes da mina de Touro dará este mércores un novo paso. A titular do xulgado mixto de Arzúa tomará declaración en calidade de investigados aos representantes das empresas Explotaciones Gallegas e Tratamientos Tecnológicos del Noroeste, TEN, aos que se lle vincula un posible delito contra o medio ambiente. As denuncias presentadas pola Fiscalía de Medio Ambiente, xunto cos escritos entregados pola asociación Aldeaviva, iniciaron este caso no que se investigan as verteduras da balsa de Angumil e tamén as da balsa de Bama ao río Brandelos, afluente do Ulla, xunto o depósito de materiais contaminantes procedentes da vella mina á contorna.
Explotaciones Gallegas, máxima accionista de Cobre San Rafael e TEN SL xa estiveron meses atrás no foco do polémica: Explotaciones Gallegas foi sancionada -varias veces- por Augas de Galicia, a última por desviar sen autorización o río Portapego, que provocou o desbordamento de augas contaminadas en espazo urbano. Pola súa banda, a veciñanza de Touro vén reclamando unha denuncia polos cheiros que provoca a planta de residuos da empresa TEN.
Ambas empresas comparacerán como investigadas e enfrontaranse a un posible delito contra o medio ambiente.
