As enquisas auguran o peor resultado histórico para o PP en Galicia nunhas Xerais

Un estudo publicado por Sondaxe reflicte o transvasamento de votos do partido gobernante a Ciudadanos e asenta a En Marea como segunda forza

A perda de votantes do Partido Popular que amosan as enquisas de todo o Estado comeza proxectarse tamén en Galicia, un dos feudos tradicionais da formación conservadora. Segundo un estudo do Instituto Sondaxe, o PP obtería as súas peores cifras nunhas eleccións ao Congreso dos Deputados en Galicia, mantendo a maioría mais baixando até o 36’9%. En Marea asentaríase como segunda forza, co 23% dos sufraxios. Luís Villares, voceiro da coalición no Parlamento galego, considera este feito como unha “perda de confianza” do núcleo de votantes do PP por mor das súas políticas.

- Publicidade -

En Marea sería a segunda forza cun 23% dos votos

Pola súa banda, o PSOE descendería ao terceiro posto co 19’8% dos votos, sendo superado por vez primeira por En Marea. O líder do grupo socialista en Galicia, Xoaquín Fernández Leiceaga, quita importancia ao asunto e considera “normal” que o seu electorado se desmobilice fóra do período de eleccións, ao tempo que confía en mudar a situación.

Pequeno aumento do BNG

Ciudadanos é o partido que máis sube, acadando un 12’6%, catro puntos máis que nas Xerais de 2016, mentres que o BNG experimentaría un pequeno aumento e se situaría no quinto posto cun 4’1% que non lle permitiría acadar representación no Congreso. Porén, dende o Bloque non prestan demasiada atención a esta sondaxe e confían en continuar a tendencia ascendente de cara ao 2020.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego