As cacharelas de San Xoán poderanse solicitar dende o 1 de xuño

A documentación para obter o permiso debe entregarse no Rexistro Xeral do Concello até o día 15

Achégase a máxica noite de San Xoán e, con ela, o elemento máis característico desta festividade: as cacharelas. Entre o 1 e o 15 de xuño, a cidadanía poderá solicitar o permiso para realizar tanto fogueiras coma sardiñadas o vindeiro día 24. No caso das devanditas cacharelas, as súas dimensións deberán cumprir a normativa local vixente.

- Publicidade -

O concelleiro de Medio Ambiente lembrou que, como cada ano, o lume estará prohibido en lugares moi concorridos como a praza do Obradoiro, Cervantes, Quintana, Toural ou Praterías. Alén diso, empraza á cidadanía a facer un “bo uso” das cacharelas. “Non se poderán queimar pneumáticos nin obxectos que emitan gases tóxicos”, explica, ao tempo que insta ás e os participantes a empregar madeira sen cravos para “evitar lesións”.

As solicitudes para montar unha cacharela en terreo público deberán presentarse no Rexistro Xeral do Concello, namentres as que se realicen nunha propiedade privada deberán notificalo a través da páxina web municipal, así como cumprir a normativa establecida polo consistorio.

Faite socia, faite socio

As socias e socios de Nós Televisión son un piar básico. Desde moi pouco, a túa achega económica pode axudarnos a consolidar este espazo audiovisual libre e en galego