A formación nacionalista Anova condena a sentenza contra os coñecidos como ‘Oito de Altsasu’, aos que tras unha liorta nun bar con dous gardas civís en Navarra lles vincularon delitos de atentado a axentes da autoridade, lesións, desordes públicas e ameazas. Nas últimas horas, o Tribunal Supremo daba o visto bo á sentenza emitida pola Audiencia Nacional engadindo unha pequena rebaixa aos anos de prisión aos que foron condenados. Deste xeito, as penas oscilan entre o un ano e medio e os oito anos e medio de prisión.
Este aval do Alto Tribunal causou indignación social e política entre os colectivos da esquerda e de defensa dos dereitos humanos. Dende Galicia, a primeira en manifestar publicamente a súa condena á sentenza foi Anova que ve neste dictame a demostración de que vivimos nun “retroceso constante nos dereitos e liberdades civís”.
A ofensiva represiva continúa no Estado español. A sentenza contra os 8 de Alsasua demostra que vivimos nun retroceso constante nos dereitos e liberdades civís. Xustiza inxusta contra os débiles e débil cos poderosos. Condena ideolóxica contra a mocidade de Euskal Herria. https://t.co/cS5LEgJir4
— anova (@anovagal) October 9, 2019
