Imaxe dunha das visitas a Anafreita organizadas por Carballo Vivo. Imaxe: Terras de Friol

Baixo a premisa “Fagámolo doado!”, a xornada organizada por Carballo Vivo inclúe visitas patrimoniais á Cova da Serpe, en Anafreita, e ao Museo Fortaleza San Paio de Narla, coa idea de “revitalizar o patrimonio etnográfico, lingüístico, histórico, e artístico, xunto coas Comunidade de Montes que promoven os produtos agrícolas e gandeiros cultivados con criterio de sustentabilidade.”

Como resultado da colaboración coa intervención educativa Modelo Burela (proxecto do IES Perdouro de Burela), levarase a cabo o obradoiro de Dinamización Cultural. Nel, gravarase de xeito participativo unha reportaxe audiovisual entre o público e as iniciativas económicas e culturais participantes: “O obradoiro buscará a implicación de todas as persoas participantes nun traballo de campo que os levará a unha casa comercial, a dúas granxas, a unha igrexa e un cemiterio e ao propio centro social da entidade organizadora”, explican desde Modelo Burela.

Na xornada participarán as explotacións gandeiras ecolóxicas Casa Bértolo e Traloagro ou o comercio Casa Terrón.

En definitiva, unha xornada para pór en valor o patrimonio e aprender audiovisual socio-comunitario. A idea está clara: converter o rural en motor económico e ambiental.

A participación está aberta a inscricións ata o xoves 5.

- Publicidade -